Дьөгуор убайым үрдүк уҥуохтаах, модьу көрүҥнээх буолан колхозка улахан дьону кытта сайынын оттоһон, кыһынын от-мас тиэйиитигэр тэҥҥэ сылдьыһара. Үөрэх кэнниттэн хаалан оскуолаҕа ыарахан, кыаллыбат үлэлэригэр көмөлөһөр этэ, киэһээ кэлэн капкаан иитэн кырынааһы бултуура. Саас уу ааспытын кэннэ үһүөн күтэрдиир этибит, ону Дьөгуор бэйэтэ тириитин сүлэн, хатаран Тиит-Арыы Роспотугар таһааран туттаран чэй, саахар, табаах, өссө биир сайын 10 м таҥаһы ылан эбэбит эрэйдээҕи сүрдээҕин үөрдэн турар. 1940 с. 7 кылааһы бүтэрэн Дьокуускайга 6 ыйдаах арыы собуотун маастардарын куурсугар үөрэнэр. Таатта оройуонугар тиийэн үлэлии сылдьан 1942 с. Сэриигэ ыҥырыллар.
Борокуодунан айаннаан иһэн Эчита утарыта балыктыы сылдьар дьону көрөн бытыылка иһигэр суругар эбэбэр биллэриҥ диэн көрдөспүт. Кинилэр этэллэринэн Дьөгуор олус да улааппыт, тупсубут, борокуот дьоно кини саннынан эрэ тураллар. Ол кэнниттэн иккитэ эрэ сурук кэлбитэ. Бастакытыгар – Читааҕа тиийэн олоробут диэн, иккиһигэр –айаннааан иһэбит. Ол сурук иһигэр Тааттаҕа бииргэ үлэлээбит дьон уопсай хаартыскатын уган ыыпыт. Уонна таҥаспын бу кыыска хааллардым, ирдээмэҥ диэбит этэ. Ол кэнниттэн туох да биллэрии да, сурук да суох. Сүттэҕэ ол.