КОМЕНДАНТ Мамсыраты Хасанбег ☆(Бдзи) райгуырд 1917 азы Джызæлы,магуыр зæхкусæг лæджы хæдзары.Уыдис йын цыппар хойы,кæстæртæ.Бынтон æрыгонæй хæдзары куыстытæ æрхаудтой йæхимæ.Фæлæ уæддæр Джызæлы астæуккаг скъола каст фæци.Уый фæстæ йæ акодтой Сырх æфсадмæ æмæ, куыд сæрæн лæппу ,aфтæ йæ иуцасдæры фæстæ арвыстой артиллерион училищема. Хасанбег хæцыди Финляндийы хæсты,Фыдыбæстæйы Стыр хæсты райдайæнæй кæронмæ фæтох кодта фашисттимæ.Архайдта Мæскуы,Ленинград, Сталинград, Белорусси,Украинæ,Польшæ æмæ Германы карз хæстыты. Мамсыры -фырты тыххæй 1373-æм фистæг æфсады полчъы командир, булкъон Лекомцев афтæ фыссы: "Товарищ Мамсуров Х.А. за время пребывания в полку показал себя дисциплинированным,энергичным,способным руководить артиллерией в объеме полка". Мамсыраты Хасанбег хорзæхджын æрцыд Сырх тырысайы орден æмæ бирæ майдантæй. Нысангонд æрцыд не 'фсæдтæ рæстæгмæ цы гермайнаг горæт Дрезден бацахстой,уый æфсæддон комендантæй. Йæ рæстæджы дзы æрцыд ахæм цау:1946 азы Джериаты Тимофей йе 'мбалимæ æрвыст æрцыд Германмæ,цæмæй райхæлдтаиккой хуыйæн машинæты заводæн кусæнгæрзтæ æмæ сæ ардæм сластаиккой.Æнæхъæн бон фæллæууыдысты рады, æмæ комендантмæ бахауын сæ бон нæ уыд. Дыккаг бон та æрбацыдысты ,лæууынц æмæ ныхæстæ кæнынц.Уыцы рæстæг комендант Мамсыраты Хасанбег цыдæр хъуыддаджы тыххæй рацыд йæ къабинетæй,æмæ сæ рæзты куы фæцæйцыд,уæд сын фехъуыста сæ ирон ныхас.Базыдта йæ хъæуккаг Джериаты Тимофейы.Сæ хъуыддæгтæ сын сарæзта. Фæстæдæр Дзæуджыхъæуы уыцы кусæнгæрзтæ æрæмбырд кодтой æмæ кусын райдыдтой хуыйæн машинæйы заводы.Йæ фыццаг директор уый Джериаты Тимофей. 1946 азы Мамсыраты Хасанбег уæгъдгонд æрцыд æфсады рæнхъытæй æмæ сыздæхт йæ райгуырæн хъæумæ. Кусын райдыдта Мидхъуыддæгты министрады Горæтгæрон районы управленийы инспекторæй,стæй Джызæлдоны районы фæндаггон хайады сæрмагонд бастдзинады хицауæй. Хъыгагæн, 1967 азы октябры,хъæбатыр хæстон Мамсыраты Хасанбег фæмарди автомобилон бæллæхы. Баззади йын чызг Беллæ æмæ лæппу Хъазыбег.