Төрөппүттэрэ - Шишкин Сергей Дмитриевич, ийэтэ – Москвитина-Шишкина Анна Петровна. Бииргэ төрөөбүт иккиэлэр этэ. Хос эһэм Шишкиннарга бастакы оҕонон төрөөбүтэ, уонна Марфа диэн балтылааҕа. Эһээбит Сергей Дмитриевич норуокка биллэр мас уонна тимир ууһа этэ. Балта Марфа ийэтинээн Ленин колхозка дояркалаабыттара.

Эһэбит Иван Сереевич эбэбин кытта сэриигэ барыан иннинэ холбоспуттар, 1941 сыллаахха бэс ыйын 27 күнүгэр повестка кэлэн сэриигэ барар, 1942 сыллаахха бааһыран сэтинньи ыйга дойдутугар төннөн кэлэр.

Ол кэлэн 1943 сыллаахха кыайыы буолуон диэри партком-председателынан үлэлээбит. Онтон кэлин Ленин колхозка үлэлээбит. Тутууга эбэбитин кытта 23 сыл бииргэ олорбуттара, аҕыс оҕону төрөтөн ууһаабыттара. Эбэм1961 сыллаахха от ыйын 18 күнүгэр олохтон туораан, аҕыс оҕо - 3 кыыс 5 уол тулаайах хаалан, эһэбит көрөн-истэн, үлэлээн ол быыһыгар ыалдьан, оҕолоро бэйэ- бэйэлэрин көрсөн улааталлар.

Сиэннэрэ араас идэлэри баһылаан, быраастар, учууталлар, инженер, совхоз, тутуу улэһиттэрэ.

“За победу над Германией” мэтээллээх.

Эһэм ахтыыта.

“1941 сыл. бэс ыйын 27 күнүгэр мин Бырдьакы сайылыгар утуйа сыттахпына сарсыарда бэрт эрдэ 3 чаас саҕана хаппараал Белоусов оҕонньор бэбиэскэ аҕалан туттарбыта.

Билҥҥи Нам аҕыс кылаастаах оскуолатын олбуоругар үс массыына кэринэ барааччылар мустубуппут. Аймахтарбыт, чугас дьоммут атаара кэлбиттэрэ. Мин оччолорго саҥа кэргэн ылбыт кэлиим этэ. Настаа массыына суол өҕүллүүтүгэр киирэн сүтүөр диэри далбаатыы хаалбыта. Миигин кытта биһиги колхозтан барыта 14 киһи барбыта. Онно Е.Пермяков, С.Жирков, Е.Аргунов,түөрт украинец (оччолорго Саха сиригэр кэлэн олохсуйа сылдьыбыттара) уо.д.а. баллар.

“Лермонтов” борохуотунан айаннаабыппыт. Читаҕа тиийбиппит кэннэ барыбытын тус-туспа араартаабыттара. Мин Колесов диэн следователи кытта иккиэйэҕин түбэспиппит. Үс ый кэринэ үөрэтэн баран фроҥҥа атаарбыттара.

57 хонук устата Курскай туһаайыыга сылдьыбытым. Биһиги чааспыт Старай школ, новый школ, Боян станцияларынан сылдьыбыта. Саллат ыар олоҕо саҕаламмыта Фроҥҥа тиийэрбитиин кытта “немец рама”диэн разведчик самолета поездпытын пулеметынан ытыалаабыта. Дьэ онтон ыла сатыы айаннаабыппыт.

Икки суукка үргүлдьү түһэн илин кирбиигэ тиийбиппит. Тула ыыс-быдаан, тыас-уус дойду этэ. Дэриэбинэлэр оһохторун эрэ хорото кэриэрэн тураллара. Биһиги кэлтэй чугуйбат этибит. Сорох күн дэриэбинэни сэриилээн ыларбыт. Дьэ ол курдук хардары-таары ылсан-бэрсэн оборуонаҕа сыппыппыт. Үксүн түүн атаакалыырбыт. Ахсынньыга ол дойдуга 30-ча кыраадыс тымныы этэ. Немецтэр итини олус улахан курдук саныыллара, дьиэлэриттэн соччо ыраата соруммат этилэр.

Тыһынчаннан дьон быыһыгар сылдьан күргүөннэх ытыалаһыы кэмигэр бу немеһи мин өлөрдүм диэн чуолкай этэргэ уустук этэ. Арай биирдэ аппа устун саһан иһэр немец үс аттаах разведчигын тоһуйан өлөрбүппүн өйдүүбүн.

Хоруо буолбут диэриэбинэлэри, куораттары, сэймэхтэммит оҕолору, оҕонньоттору көрө-көрө өстөөххө өһүөммүт күнтэн-күн күүһүрэн испитэ”.